اسم البرنامج: الكلمة
اسم المادة: كيف نلفظ اسم الخالق سبحانه
سؤال لو قدمولك check بقيمة 500،000 دولار بتستغني عن عيونك؟
لو كثَروا المبلغ شوي بتستغني عن إيديك؟
الجواب أكيد لا، لأنو هيدي النعم نحنا ما منقدر نحطلها رقم، ما منقبل نبيعها وما منقبل نتخلى عنها.
رب العالمين عطانا نعم كثيرة، ما منقدر نعدها، نحصيها، نعمة عيون، نعمة شم، نعمة سمع، نعمة نطق، نعمة فهم، نعمة قلب، نعمة ليل ونهار، نعمة شمس وقمر، تخايل أنت كم عظمة في بجسم الإنسان.
أنت بحاجة لكل عظمة فيهن كبيرة وصغيرة، تخايل عندك كليتين، بتتعطَل واحدة بتشتغل الثانية، بتتخايل الكبد قديش بحافظ عالسكر، لما تكون أنت بحاجة لهيدا السكر لحتى تستعمله.
بتتخايل إنو رب العالمين أنعم علينا بنعمة أكل وشرب، نعمة أهل ورفقاء وأصحاب وعيلة، نعمة مجتمع، نعمة بيت، نعمة الفرحة والنَفس، نعم ما منقدر نحصيها كل واحدة منهن لو خسرناها منحس حالنا ضايعين.
سؤال كل هيدي النعم يلي ربنا عطانا ياها، كيف منتلفَظ باسمه، كيف منتلفَظ بلفظ الجلالة الله، ما بدَك تنقص هيدي الكلمة، كل كلمات العالم لما بدَك تقولها، بدَك تكملها وهاي الكلمة لما بدك تقولها بدَك تستحي تكمِلها.
اسمه عبد الله، مرحبا كيفك؟
الحمد لله الحمد لله عالسلامة ما بدَك تستحي أنت وعم تقول اسم الخالق، اسم يلي وهبك وعطاك اسم الله قال الله تعالى {وَلِلَّهِ الْأَسْمَاءُ الْحُسْنَىٰ فَادْعُوهُ بِهَا ۖ وَذَرُوا الَّذِينَ يُلْحِدُونَ فِي أَسْمَائِهِ ۚ سَيُجْزَوْنَ مَا كَانُوا يَعْمَلُونَ}.