اسم البرنامج: الكلمة
اسم المادة: فقير يسأل الرسول يا ترى ما كان جوابه عليه الصَلاة والسلام
فيِي إسألك سؤال؟
عكم مطعم صرت رايح بحياتك؟
وفيِي إسألِك سؤال؟
كم فستان صرت لابسة بحياتك؟
رقمك صار كثير كبير، كم سفريَة صرت مسافر؟
كم شهادة ناوي تحصِّل؟
طيِب والطموح لقدِي؟
ناوي تزيدن؟
خليني أسألك هلَق السؤال المهم عكم فقير صرت متصدِق؟
الصدقة أمرها كثير مهم، أوعى تضيِعها، سيدنا محمد عليه الصَلاة والسَلام علَمنا ونشر بين أصحابه أمر الصدقة، لو بالقليل، لو بشق تمرة.
اسمع معي هالقصة، بقولوا إنو النبي محمَد عليه الصَلاة والسَلام بفوت على بيته وبيسأل زوجته عن شاة كانوا ذابحينا شو عملت فيها، والشاة يمكن خروف، فبتقلو: “يا رسول الله لم يبق منها إلا الكتف”.
هي قصدها إنو تصدَقنا فيا كلها وتركنا الكتف، فبتقلو: لم يبق منها إلا الكتف” فبقلها: “بل بقيت كلها إلا الكتف”.
ما تقلي أنت بس وقت الإمتحان بتتصدَق، يكون عندك finals وقتها بتشفق عالفقير، ما تقلي بس يكون في مرض وخايف منه وقتها منتصدَق، وما تقلي بس تكون بالسيارة ويجيك هالفقير صار بدك تعلي الشباك وتقطع الإشارة حمرا.
هولي فقرا، بكفي إنو جايين يسألوا، شوف النبي محمَد عليه الصَلاة والسَلام قاعد مع أصحابه وقاعد بلال، مش النبي محمد مرة قلو لبلال: “أنفق بلال ولا تخش من ذي العرش إقلالا”.
قاعدين وبلال عم يحضر، بفوت رجال وبيطلب وبيسأل من النبي محمد عليه الصَلاة والسَلام، الصدمة إنو النبي محمَد ما معه، النبي محمَد ما بيملك شي يعطيه، شو بكون الجواب؟
أنت بهيك موقف كيف بتتصرَف؟
كان جواب النبي محمَد عليه الصَلاة والسَلام “ليس معي ولكن ابتع عليَّ”، روح اشتري والدين عليي وأنا يلي بسكِر.
كانت صدمة، فقام بلال وقال نفس يلي تعلمه من النبي محمد عليه الصَلاة والسَلام “يا رسول الله أنفق ولا تخش من ذي العرش إقلالا”.