اسم البرنامج: الكلمة
كيف تتشقق السماء وكيف تتبعثر القبور
{فِي يَوْمٍ كَانَ مِقْدَارُهُ خَمْسِينَ أَلْفَ سَنَةٍ}.
تخايل قاعدين بالبيت والسقف بلَش يتشقَق، وحجار عم تنزل علينا، تخايل لو البحر من ماي بدو يولِع بالنار، تخايل لو الجبل مثل ما هو بدو ينَسف ويصير غبرة، تخايل يوم القيامة بدايته بتكون بانشقاق السَماء {إِذَا السَّمَاءُ انفَطَرَتْ (1) وَإِذَا الْكَوَاكِبُ انتَثَرَتْ}، النجوم بدها توقع
{وَإِذَا الْبِحَارُ فُجِّرَتْ}، بالنيران
{وَإِذَا الْقُبُورُ بُعْثِرَتْ}، فوق بصير تحت وتحت فوق، يمين شمال وشمال يمين {عَلِمَتْ نَفْسٌ مَّا قَدَّمَتْ وَأَخَّرَتْ}.
هيك بتكون بداية يوم القيامة ومدته خمسين ألف سنة مثل ما قلنا بالآية {فِي يَوْمٍ كَانَ مِقْدَارُهُ خَمْسِينَ أَلْفَ سَنَةٍ}.
خمسين موقف، كل موقف ألف سنة، يوم القيامة، يوم الآخرة، يوم الصَاخَة، يوم الطَامَة، يوم الحساب، يوم الجزاء، يوم الأهوال، يوم الفزع الأكبر، موقف تلو الموقف، موقف تلو الموقف حتى يوصَلوا للصراط والصراط هو جسر عريض وطويل، ألف سنة صعود، وألف سنة استواء، وألف سنة نزول، هيدا الصِراط إلو طرفين، طرف بالأرض المبدَلة وطرف بعده الجنَة.
الأرض المبدَلة هي أرض ما بتشبه هاي الأرض، مثل الجلد المشدود، ما فيا جبل، ما فيا وادي، ما فيا شجر، حدا يتخبَى، أو في مين يهرب، أبدا.
ببلشوا النَاس بدُن يمشوا على هيدا الصراط يلي منُو مؤمن ما عنده حسنات، أول ما يحط إجريه على الصِراط بينزل والعياذ بالله إلى جهنَم.
أمَا المؤمنون فتجري بهم أعمالهم، بتقلي شو يعني فتجري بهم أعمالهم؟
هلَق أنت بتاكل بتتنشَط، عضلات بتمشي أكثر، عندك لياقة أكثر وأكثر، أما عالصراط ما بكون في قوة للجسد، إنما الحسنات هي يلي بتمشي الإنسان.
على قد ما عامل، وعلى قد ما عنده حسنات، على قد ما بيقطع وبيتجاوز أكثر، في ناس بتطير، في ناس بتمشي بس بسرعة، في ناس بتمشي عمهلها، وفي ناس ما بتلحق توصل بتوقع.
مشان هيك الواحد بدو يكثِر حسنات، لا سيَما بهيدا الشَهر، لأنو هيدا الشَهر شهر خير، شهر بركة، شهر فضيلة، وشهر حسنات بتضَاعف فيه الأجور والحسنات.
فقد الواحد يعمل أعمال قليلة بهيدا الشهر ويكون عند رب العالمين أجره مضاعف مضاعف مضاعف.