البرنامج: عقيدة المسلمين
الشيخ: طارق اللحام
الدرس: السّحر
الحلقة: 16
السّلامُ عليكم ورَحمةُ اللهِ وبركاته:
أسعد الله تعالى أوقاتكم بالخيرات والمبرّات، الله تعالى يبارك لكم وفيكم وعليكم لا تنسوا الإخلاص لله تبارك وتعالى.
الآن إن شاء الله تبارك وتعالى سنبدأ بالسؤال الرابع والعشرين والخامس والعشرين بإذن الله عزّ وجلّ، ولا تنسوا يا أحباب التسجيل تسجيل الملاحظات والتدوين هذا خير عظيم فإن هذا صيد والإنسان الذي لا يقيد الصيد يتفلّت منه، يعني بعد مدة الواحد منا ينسى، لذلك نسجّل وندون وهذا خير عظيم بإذن الله تعالى.
بسم اللهِ والحمدُ لله وصلّى الله وسلّم على رسول الله.
تكلم عن العمل بالسّحر؟
الجواب: العمل بالسحر حرام قال تعالى:{وَمَا كَفَرَ سُلَيْمَانُ وَلَكِنَّ الشَّيْاطِينَ كَفَرُواْ يُعَلِّمُونَ النَّاسَ السِّحْرَ}
الحديث: “اجتنبوا السبع الموبقات قيل وما هي يا رسول الله؟ قال: “الشّرك بالله والسّحر” الحديث رواه مسلم.
ما الدليل على أن من رمى ورقة فيها اسم الله في القاذورات بقصد الاستخفاف يكفر؟
الجواب: لا يجوز رمي ورقة فيها اسم الله في المستقذر والذي يفعل ذلك استخفافا يكفر، قال تعالى: {قُلْ أَبِاللَّهِ وَءايَاتِهِ وَرَسُولِهِ كُنتُمْ تَسْتَهْزِءُونَ (65) لاَ تَعْتَذِرُواْ قَدْ كَفَرْتُم بَعْدَ إِيمَانِكُمْ} قال ابن عابدين رحمه الله:” يكفر من رمى المصحف في القاذورات ولو لم يقصد الاستخفاف لأن فعله يدلّ على الاستخفاف”.
بسم اللهِ والحمدُ لله والصلاة والسّلام على سيد الأنبياء والمُرسلين، وعلى آلهِ وأصحابه الطيبين الطّاهرين.
يا أحباب اليوم إن شاء الله الكلام على هذه المسألة والموضوع المهم وهو التحذير من السّحر، وهذا يا أحباب حرام من الكبائر كما سمّاه رسول الله صلّى الله عليه وسَلّم من الموبقات، ما معنى المُوبقات؟ المُوبقات يعني المهلكات، هذه المعاصي الكبيرة يعني التي ورد مثلا الوعيد الشديد فيمن فعلها أو أنه يقام عليه الحدّ في هذه الدّنيا كالجَلْد أو الرّجم ونحو ذلك وأيضا إذا أخبر ربُّنا تبارك وتعالى أو النبي عليه الصلاة والسلام بأنّ من فعلها له الويل أو ملعون، فبمثل هذا يُعرف أن هذه الذنوب كبيرة، والكبائر يا أحباب أعلاها والعياذ بالله تعالى وأشدّها الكفر كما مرّ معنا وهو من المهلكات، وأما ما دونه من الكبائر فإن المسلم الذي يقع فيها ولا يستحلّها لا نكفّره كما يقول الإمام أبو جعفر الطحاوي رضي الله عنه: “ولا نكفّر أحدا من أهل القِبلة بذنب ما لم يستحلّه” يعني طالما هيدا الإنسان ما اعتبره حلال إنما عمله لهالحرام، هيدا ما منكفّره، وإنما منقلو حرام، أثم يعني عليه معصية من الكبائر، ولما نقول كبيرة، قدي هني هول الكبائر؟ مش بس سبعة، لكن بهالحديث عليه الصّلاة والسّلام ذكر سبعة قال: “اجتنبوا السّبع المُوبقات” بغيرها ذاكر 3 وبغيرو ذاكر 2 واحدة، وبحسب ما قال بعض العلماء هي إلى السبعين أقرب، وبعضهم بالغ وجمع في تعداد الكبائر كتابا عدّها 400 هيدا مبالغ فيه كتير، لكنْ هي إلى السّبعين أقرب كما قال ابنُ عباس رضي الله عنهما وهو ابن عمّ رسول الله صلّى الله عليه وسَلّم، فالسّحر يا أحباب من أ كبر الكبائر وهو نوعان، السّحر منه ما يُحوج إلى أعمال أو أقوال كفرية فهو من نوع الكفر، يعني بقوموا فيه بأشياء بيعملوا أعمال أو بقولوا أقوال في حُكم الدين حكمها أنها كفر، فلا شكّ بكون هيدا السّحر يُخرج صاحبه من الدّين وفي سِحر هو دون ذلك لما نقول دون لكن من الكبائر يعني ما في سحر معْصية صغيرة، إنما هذا السحر من الكبائر بل من أكبر الكبائر، وننتبه كمان يا أحباب لو كانت بعض النسوان أو بعض الرجال بقلك أنا حتى حبّب فلان بفلانة بقوم بكتبلهن سِحر أو بدي لحتى يكون زوجها متل خاتم بإصبعها أو عند حماتو كيف ما بدها بتحرّكه أو حتى يكون هيدا شريك مع هيدا إلى آخره بقلك: أنا نيتي منيحة بعمل سِحر أعوذ بالله، لا هيدا ما بجوز بدّك توصل لهدفك اللي هو حلال الهدف بتوصل بالحلال ما بتسلُك السّحر، السّحر من الكبائر النبي عليه الصّلاة والسّلام قال: “ليس مِنا مَن سَحَر أو سُحر له” يعني الإنسان اللي بيعمل السّحر هيدا ما بكون على طريقة النبي الكاملة يعني عليه معصية من الكبائر منو كامل الإيمان، وكمان إذا هو طلب من السّاحر إنو يعمل سحر، لأنو أحيانا هو الواحد بإيدو و العياذ بالله بيعمل السَحر وأحيانا بروح عند الساحر بقللو اعمل لي، وهون إذا دفعلو مصاري لهيدا السّاحر بتكون معصية زايدة يعني صار عليه معصيتين معصية دفع المال في الحرام وأي حرام وهيدي كبيرة، والسّحر انو يطلب من واحد يعمل له سِحر على فلان هيدي كمان كبيرة.
والقرآن الكريم منعالج به المَسحور ولا يُعمل به السّحر هيدي قاعدة يا أحباب لكن بعض السّحَرة شو بتلاقيهن يعملوا حتى يموهوا على الناس، إنو هني كاتبين آيات من القرآن بقوموا شو بيعملوا؟ بيكتبوا السّحر وبحطوا آيات أو بحطوا آيات بمرقوا بيناتها السّحر عبارات وطلاسم ورموز هني بيعتمدوها فاللي بيقرأ بفكرها آيات شو بكونوا عاملين؟ دمجوا بينها حتى يعملوا هذا.
وأحيانا والعياذ بالله تبارك وتعالى بموّهوا كتير من الناس بقولوا عن حالهن نحنا روحانيون وهني بكونوا بيتعاطوا مع الجن والشياطين وأحيانا بس حتى ياخدوا مصاري من الناس، فأُنبّه يا أحباب لا يجوز لنا أن نأتي السّحرة يعملولنا السّحر ولا أن نسأل كهنة والعرافين هيدا كمان حرام، شو يعني؟
الكاهن هو اللي بيصير يتنبأ عن الأمور المستقبلية حيصير معك كذا حيصير معك كذا ومنهم بزعمه يقرأ بالكفّ بقللك أنت قدامك طريق طويلة، وجاييك رزقة وجاييك عريس وهالقضايا هذا لا يجوز، وكذلك ما يُسمى البصارة إنتبهوا هذا أيضا كمان بتعتمد بزعمها أحيانا على سُبّحة بتحملْها أو على الضرب بالزّهر بترميه بطريقة معينة أو بيعملوا أشياء أخرى هذا أيضا لا يجوز.
ومثله يا أحباب العرّاف مين العرّاف؟ هيدا اللي هو بيصير يخبر عن الأشياء المَسروقة والمفقودة واحد خُطف ولده سُرقت سيارته بروحوا لعند هيدول الناس بقولولهن عرافين، هيدا حرام كمان ولا يجوز، قال صلّى الله عليه وسَلّم: “من أتى كاهنا أو عرّافا فسأله فصدّقه فقد كفر بما أُنزل على أبي القاسم” صلى الله عليه وسلم، أبو القاسم هيدي كُنية نبينا محمد عليه الصّلاة والسّلام، شو يعني يا أحبابي، يعني نحنا حرام علينا نعتقد فيه أنه يعلم الغيب لايعلم الغيب كله إلا الله تبارك وتعالى، فالحاصلُ لا نعمل بالسّحر ولا نذهب إلى هؤلاء العرافين ولا الكهنة ولا ما يُسمى ضرب المَندل بزعمهم بحضروا أرواح، وهيدا غير صحيح ولا الضرب بالرمل بزعمهم كذلك ليقرأ لك الحظّ ولا بالفنجان حتى ولو عن مزح بالصّبحيات اللي بتعملها النسوان بهالإيام، بقولوا لبعضهن: انو نحنا هلأ بدنا نتسلى بتصير كمان بتقللها يي حية انتبهي، يي جاييك كمان مدري شو! انتبهي بدو يصير معك كذا، هذا أيضا لو عن مزح حرام، فالنبي عليه الصّلاة والسلام يقول: “مِن السّبع المُوبقات السّحر” والله قال في القرآن الكريم: {وَاتَّبَعُواْ مَا تَتْلُواْ الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيْاطِينَ كَفَرُواْ يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولاَ إِنَّمَا نَحْنُ فِتْنَةٌ فَلاَ تَكْفُرْ} سيدنا سليمان عليه السلام الله أعطاه السيطرة على الجنّ المؤمن والكافر، وكانوا ينفذوا أوامره حتى الكفار منهن واللي ما ينفّذ أوامر سيدنا سليمان بتنزل عليه الصاعقة تقتله، وأعطاه الله أنو كان يحبسهن بقوارير يللي هو خالف أوامره لسيدنا سليمان، فلما شعر باقتراب أجله عليه السلام اتّكأ على عصا وطلب من الله أن يُخفي أمر موته عن الجنّ كان مُوكّلهم بأعمال شاقة بناء وجاب حجار ويغوصوا بالبحار يعني أشياء عجيبة فهني لا يعلمون الغيب، الله تبارك وتعالى أعطى سليمان ذلك اتّكأ على عصا ومات هني شو فكروا إنو عامل خلوة يعني يختلي كان عندو عادة أن يختلي بنفسه عليه السلام فبقوا على مدة وهم يظنون أنه في خلوة يعني عايش وهني عميشتغلوا حتى جاءت أرضة متل السّوسة نخرت هيدي العصا وانكسرت فوقع سيدنا سليمان فظهر أنه كان مات من مدة وظهر لهم أنهم لا يعلمون الغيب، فماذا فعل الشياطين أرادوا الانتقام من سيدنا سليمان النبي عليه السلام قاموا كتبوا سِحر وحطوه تحت الكرسي الي كان يقعد عليها سيدنا سليمان صلّى الله عليه وعلى نبينا وسلّم، وظهروا للناس هيكي بشكل بشر شو قالولهن: “إن سليمان كان يحكمكم بالسَحر احفروا تحت كرسيه تجدونه” فحفروا فوجدوا و العياذ بالله هذا السحر فكل واحد صدّقهن خرج من الإسلام ليه؟ لأن النبي ما بيوقع بالكبائر والنبي ما بيعمل سحر، والمسألة الثانية أن الله برأه في هذه الآية، {وَمَا كَفَرَ سُلَيْمَانُ وَلَكِنَّ الشَّيْاطِينَ كَفَرُواْ} هني عم يتعاطوا بأشياء فيها كفر والعياذ بالله، أما هاروت وماروت هيدول ملكان كريمان على الله ما اشتغلوا بالسّحر على معنى هني صاروا يشتغلوا يعملوا للناس، لأ إنما أمرهم الله إنو ينزلوا ببابل هيدي بالعراق وصلوا الناس لمرحلة ما بقى عم بميزوا بين السّحر والمعجزة، يعين بين الساحر والنبي ما بقى يفرقوا من كترة السّحر فنزلوا هالملكان بأمر من الله يعلّموا الناس السّحر ويبينولهن كلما يعلموا واحد شو يقولوله إنما نحن فتنة إمتحان ابتلاء من الله انتبه فلا تكفر، ففي ناس انحرفت والعياذ بالله وفي ناس تراجعت.
فالحاصل يا أحبابي ما في نبي تعامل بالسّحر، طيب هل يُعمل السّحر على نبي؟ قال العلماء: نعم قد يعملوا السحر على نبي، ولكن مابأثروا على عقل النبي ولا بيقدروا يسيطروا على لسان النبي يعني يجري كلام بغير إرادته ولا بيقدر يفوت الجنّي بجسد الأنبياء هذا مستحيل على الأنبياء عليهم السّلام، طيب قد يمرض؟ قال بعض العلماء نعم كما حصل مع نبينا عليه الصلاة والسلام أرسل الله تعالى إليه ملكين وقرأوله سورة الفلق وسورة الناس كان في واحدة يهودية عاملتلو 11 عقدة سِحر نوع تقيل من السّحر وحطتو ببير مهجورة ثم بعد ذلك قرأوا عليه فتعافى وقام عليه الصلاة والسلام.
والسّحر يا أحباب من الكبائر من أكبر الكبائر وكما ذكرت بعض النّاس يعملون فيه أمورا من الكفر كيف؟ بيكتبوا الآيات مثلا بالبول وهذا مُخرج من الدّين واحذروا ما بيصير شفاء بزعمهم إنو الواحد يكتب الفاتحة بالبول، شو هالشّفاء على زعمهم أعوذ بالله ولو كان موجودة في بعض الكتب فإنها دسّ على ابن عابدين رحمه الله، وكذلك هذا من الكفر الفعلي وبعضهم يسجد للشمس أو يذبح لغير الله تبارك وتعالى وهذا أيضا يُخرج من الدين.
وأما السؤال الخامس والعشرون ما الدّليل على أن من رمى ورقة فيها اسم الله في القاذورات يكفر؟
أنا هنا الآن سأذكر لكم القولين في هذه المسألة وهذا السؤال كان مكتوبا على أحد القولين سأذكر القولين ثم أُبين تفصيل العلماء في هذه المسألة.
أولا: قول واحد ما هو؟ أن من رمى القرآن في القاذورات هذا خرج من الدين هيدا بقولولوا يا أحباب كفر فعلي لأنو كما مر معنا في كفر بالأفعال في كفر بالقلب اعتقادي وفي كفر منقللوا نحنا لفظي أو قولي لأنو باللسان هذا من الأفعال التي من صدرت منه يخرج من الإسلام وكذلك أي آية أو جزء من القرآن يعني ربع ياسين جزء عمّ جزء تبارك جزء قد سمع سورة آية مكتوبة على ورقة واحد انتبهلها قام رماها بالزبالة خرج من الإسلام قصد الاستخفاف أم لم يقصد الاستخفاف شو يعني؟
يعني هيدا الإنسان يا أحباب إذا قالنا أنا ما قصدت الاستخفاف؟ منقللو لو ما قصدت الاستخفاف فعلك يدل على الاستخفاف كما قال أيضا ابن عابرين رحمه الله، هيدا من علماء الحنفية المـتأخرين يعني القراب منّا بالزمن عندو كتاب اسمه حاشية ردّ المحتار على الدّر المختار ماذا قال؟ قال: “إن من رمى المصحف في القاذورات كفر ولو لم يقصد الاستخفاف ليه، قال لأن فعله يدلّ على الاستخفاف يعني قصد أو ما قصد هذا لا يُعذر، طيب أما الورقة التي فيها اسم الله، أو اسم معظّم مين هي الأسماء المُعظّمة؟ متل أسماء الأنبياء إذا أُريد بها النبي يعني محمّد عيسى موسى وأُريد بها هؤلاء، مش واحد اسمه محمد من أُمة النبي سموه محمد هيدا فيك ترميلو اسمو إي بيجوز لكن مكروه لأن قالوا العلماء اللغة العربية لو كانت هيدي أسماء منّها معظمة رميها بالزّبالة هيدي مكروهة، سبحان الله فالأحسن نحنا يعني اللغة العربية نتلفها أو نحرقها أو نحو ذلك إذا الواحد بدو يخلص من هالورقة ولا ترمى ولكن إن رماها مكروه منو حرام أما لما يكون فيها اسم معظّم كشهر رمضان كاسم الله كمسألة شرعية حكم ديني أو مثلا حديث لرسول الله صلّى الله عليه وسلّم أو فتوى دينية فيها حلال وحرام لا يجوز ونحو ذلك مسألة كاملة هيك في الدّين نحنا ما منرميها هيدي يا أحباب ما نرميها بالقاذورات، لما نقول قاذورات ما بس الزبالة يعني المكبّ، مكان مستقذر يعني مثلا مكان بينداس بالأقدام وعليه هيك وحْل وأشياء بيدعسوا عليها بالإجرين أو في مخاط وبزاق ونحو ذلك هيدي يقال لها شو؟ مستقذر مستقذرات، منها طاهرة ومنها نجسة كمان بول غائط هيدا مُستقذرات فيللي بيرميها على هذه المستقذرات أو في القاذورات يعني مكان تجميع الزبالة فشو حُكمها هيدي الورقة اللي فيها اسْم الله ما فيها آيات؟
العلماء قالوا قولان، شو هي؟ القول الأول قالوا: كَفر ولو لم يُرد الاستخفاف لأن فعله يدل على الاستخفاف، وهذا القول الذي قاله شيخنا آخر حياته رحمه الله، والإنسان يللي صدر منه هذا يتشهّد ويرجع للإسلام بالشهادتين.
طب شو القول التاني المذكور هلأ بالسؤال 25؟
القول التاني: إنو إن أراد الاستخفاف كفر وإلا فحرام من الكبائر ما عم يحكوا عن القرآن ما عميحكوا عن الآيات أو جزء من القرآن عميحكوا عن ورقة فيها اسم معظّم متل ما قلنا اسم من أسماء الله الرحمن الرحيم القدوس الله الرزاق الخالق ونحو وذلك أو فيها من أسماء الأنبياء ومقصود بها الأنبياء ونحو هذا، فمن رماها في القاذورات وهو منتبه إنو فيها اسم معظم كمكة كالمدينة المنورة ورماها هيدا بدو يتشهّد، أما بعض الناس قد يكون منو شايف بهالورقة شو فيها فإذا رماها ما عليه ضرر، وبعض الناس ما هو اللي رماها لكن رآها مرمية في الطريق فماذا يلزمه؟
وجب عليه رفعها كما حصل مع بِشر الحافي رحمه الله، أنا بنصحكم لله تبارك وتعالى هيدا الرجل كان عامل معاصي كتير شاف ورقة فيها اسم الله وهيدا عليها هيك غبرة قام نضّفها واشترى طيب بدرهم وطيّبها حط عليها عطر يعني حتى يبرّك هو اسم الله فيه بركة، فرُؤي في المنام بأن الله تعالى سيُطيّبه كما طيّب اسمه، فاصطلح حاله وشد همته وتعلّم وأدى الواجبات واجتنب المحرمات وصار من الأولياء بشر الحافي رحمه الله.
فهيك يا أحباب أنت ما تستحي إن رأيت ورقة فيها اسم الله لمّها وبقللكن كمان كتير من الرزنامات والإمساكيات اللي هي بتنعمل برمضان بيكتبوا عليها أمور معظمة آيات وغير آيات متل يوم الجمعة هذا الجمعة اسم معظّم يعني يُراد به اليوم شهر رمضان هذا كلمة رمضان يراد بها الشهر مش واحد اسمو رمضان إنسان، لأ، الشهر هذا اسم معظم فلا نرمي هذا في القاذورات.
أنا كنت مرة مع بعض الأحباب عمنزور إنسان فوجدنا عباب داره والعياذ بالله الحمد لله تقبل وتراجع شو هي؟ كيس زبالة وبقلبو عدة كتب وبيناتهن هني يعني عالوجه في بقلبو ربع ياسين وطلع وراها كمان أنا وعمشيلو في جزء عم كاببهن بالزبالة، الحمد لله تشهد وتراجع وتعلم وتقبل، وكنت مرة أخرى مع بعض الأحباب فجأة وقع نظري هيك عمكب زبالة أنو كمية كبيرة كانت أكتر من 120 مصحف غير أغلفة المصاحف وأوراق كأنو مطبعة طالع عندهم الطباعة غلط فراميينها قمنا نزلنا هيك نلملم فيها هيك والحمد لله وشلناها، واحدة كانت في بلاد الحجاز وهونيك بيكتبوا عالقناني مكة المكرمة وبيكتبوا المدينة المنورة ومكة والمدينة هيدي اسم معظم ما منرميها، فهي كان لما يوقع نظرها على قنينة فيها هذا الاسم توطّي وتشيلها فصار بعض من حولها من أهل زوجها يحكوا عليها ويأذوها بالكلام إنو شو هيدا وكذا والعياذ بالله فهي مرة نامت متضايقة إنو هي عم تعمل هالشي لله تعالى فترى النبي عليه الصلاة والسلام في المنام يضحك لها وحامل كيس وناداها فصار يلمّ هو معها هالقناني اللي عليها اسم مكة والمدينة ويحط الورقة بهذا الكيس، فبعدها فاقت قالت لي مسرورة الحمد لله بشرى يعني شافت النبي عليه الصلاة والسلام إضافة أنو تشجعت أكتر ما بقى فارقة معها حكيوا عليها شأنهم إلى الله.
وكان الشيخ مصطفى نجا مفتي بيروت الأسْبق رحمه الله كان هو مفتي وكان يُعطى مال على أنو هو مفتي رحمه الله فما ياخدوا هيد المال لإلو شو يعمل؟ استأجر شخصا عنده عاهة عندو إيد مقطوشة وعلقلو متل كيس جنفاص كبير وحمّله متل عصاية طويلة وبقلبها هيك متل دبوس شي بيلقط بشك أي ورقة باللغة العربية مش بس أسماء معظمة يبرم بشوارع بيروت كل ورقة فيها ورقة عربية يشيلها ويحطها بالكيس.
نعم يا أحبابي الواحد منا يعظّم هذه الأوراق التي عليها اسم الله المعظّم فهيدا اللي بيرمي القرآن في القاذورات وقع بكفر فعلي.
والقاعدة: أن كل فعل لا يصدر إلا من كافر فمن فعله فقد كفر كالسّجود للصنم شو هو الصنم يا أحباب؟
هي الصورة مجسمة أو غير مجسمة اتُخذت للعبادة يعني مش كل تمثال منقول عنه صنم، أحيانا بيعملوا تمثال لحاكم بلد رئيس بلد بس لا يعبدونه، هيدا منقولوا تمثال، ولكن ما منقولوه صنم، الصنم الذي اتُّخذ للعبادة سواء كان من حديد نحاس من دهب من خشب هيدا مَن سجد له كفر ولا يُسـأل عن قصده يعني ما منقللوا إنت شو قصدك، مجرد هيدا الفعل أخرجه من الإسلام، وكذلك أيضا من الأفعال التي تخرج من الدين السجود للشمس أو القمر هيدا كمان ما فيها تفصيل، ومن يذبح لغير الله يعني عند الذبح مثلا قال باسم محمد باسم عيسى أو باسم علي أو باسم الرفاعي هذه الذبيحة ميتة لا تؤكل وهو هيدا الإنسان اللي قال هيك عند الذبح خرج من الدين، نحنا منذبح لله تبارك وتعالى عن روح سيدنا محمد منوزعها لله تعالى ليوصل الثواب لفلان أو فلان أو فلان.
فالحاصل المسلم يتجنب الكُفريات بأنواعها، ثبتني الله وإياكم على الإيمان وختم الله لي ولكم بالحُسنى آمين، والسلام عليكم ورحمة الله وبركاته.
