عقيدة المسلمين – الشيخ طارق اللحام – النذر
النص:
السلام عليكم ورحمة الله وبركاته:
أهلا ومرحبا بكم يا أحبابي نخلص النية لله عزّ وجلّ “إنما الأعمال وبالنيات وإنما لكل امرئ ما نوى” والآن إن شاء الله تبارك وتعالى سنقرأ السؤال السادس والعشرين والسابع والعشرين إن الله تعالى يسر لنا.
بسم الله والحمد لله وصلى الله وسلم على رسول الله
السؤال: يقول ما حكم النذر؟
الجواب: يجوز النذر فيما هو قربة إلى الله، ويجب الوفاء به أما ما هو محرم فلا يجوز ولا يجب الوفاء به قال تعالى: {يُوفُونَ بِالنَّذْر} الحديث “من نذر أن يطيعَ الله فليطعه ومن نذر أن يعصيَه فلا يعصيه” رواه البخاري.
السؤال السابع والعشرون: ما الدليل على أن صوت المرأة ليست عورة؟
الجواب: قال تعالى:{وَقُلْنَ قَوْلًا مَعْرُوفًا} الحديث قال الأحنف بن قيس: “سمعت الحديث من في أبي بكر وعمر وعثمان وعلي فما سمعته كما سمعته من في عائشة” رضي الله عنها” في أي فم رواه الحاكم في المستدرك.
فاليوم إن شاء الله يا أحباب الكلام عن النذر وعن صوت المرأة وحنتطرق إن شاء الله تبارك وتعالى لبعض الأمور تتعلق بالمرأة كوجهها والاختلاط مع الرجال إلى غير ذلك.
فيقول المؤلف ما حكم النذر؟
أولا يا أحباب النبي عليه الصلاة والسلام أعطانا القاعدة شي هي؟ قال عليه الصلاة والسلام “من “نذر أن يطيع الله فليطعه ومن نذر أن يعصيه فلا يعصيه” يعني بالأصل يا أحباب نحنا بدنا إذا بدنا نعمل نذر يكون هيدا النذر في طاعة الها شروط هلأ حنذكرها، طيب شو تعريف النذر شو هو هيدا النذر؟
أولا كل لفظ فيه إلزام النفس بشيء مثلا قال: لله علي أن أفعل كذا، بدي أذبح شاة خروف بدي أعطي فلان 100 دولار أريد أن أصلي ركعتين أريد أن أصوم يومين تطوع يعني فهيدا بيقولوله نذر أو بقول نذرت أو نذرا علي مثلا، هيدي كلها ألفاظ ولكن لا تكون إلا في الطاعة، فما بينذر الواحد شي حرام، كتير من الناس كانوا في الماضي ينذروا نذور وهيدي ما بتصح وهيدي حرام، شو بيعملوا؟ بيقولوا إن إجاني ولد بدي إبرم حافية كاشفة الرأس مرأة بتكون يعني إمرأة بشحذ من كل واحد اسمه محمد وكل واحدة اسمها فاطمة هيدي كانت مشهورة ببيروت، هيدا ما بصح النذر لأنه ما أي إنسان يحل له أن يشحذ الشحاذة تجوز في حالات، وأما هذا النذر يعني ما بتوفيه وعليها معصية بهيدا النذر وبدها تتوب إلى الله تبارك وتعالى، النذر ما بكون كمان بشيء هو فرض، يعني إذا واحد مثلا قال: نذرت لله تبارك وتعالى أن أصلي فرض الظهر ما بصح هيدا النذر لأنو أنت بالأصل فرض عليك تصلي الظهر ما بقول نذرا لله علي أن أصوم رمضان، شهر رمضان صيامه فرض، فما بيصح إنو الواحد ينذر الفرض، هو فرض، إنما إن نذر أن يصوم مثلا إثنين وخميس هذا يصح، نذر أن يصوم مثلا كل شهر أيام البيض الي هي 13 – 14- 15 من كل شهر قمري هيدي بيسموها الأيام البيض وهيدي صيامها سنة والنبي عليه الصلاة والسلام شجع على صيامها، ففيه ثواب، نذر إنو يعطي فلان مالا وأحيانا بعض الناس بيعملوها معلقة وهيدي بتصح كمان شي هي؟ بقول مثلا: إن شفي ولدي نذرا علي أن أذبح شاة نذرا علي إن شفي ولدي أن أتصدق بمائة ألف ليرة للفقراء مثلا، أو بعض الناس ينذرون لبعضهم ولو كان غنيا شو بقلو؟ نذرت لك هذا الخاتم أو يقول نذرت لك هذا المال، هنا دخل المال بملكه ولو هيداك ما قَبِل خلص صاروا لإلو، هيدا الخاتم إذا نذرلو ياه صار لإلو. فهنا انتبهوا يا أحباب لما الواحد ينذر نذرا للفقراء نذر عام بسموه، ما بيجي الواحد هو بياكل منو يعني الناذر، إنما النذر العام بوزعه على الفقراء اللي هني مستحقين للزكاة، يعني فقير غير منسوب مثلا، فما أي إنسان منعطيه الزكاة ولا كفارة اليمين ولا فدية الصيام ولا زكاة الفطرة ولا حتى هذه الي منقللها نحنا النذر العام حتى ياخد الواحد من هذه الأشياء اللي ذكرتها الزكاة زكاة تجارة زكاة مال زكاة دهب أو غيرها من أنواع الزكاة زكاة الفطرة اللي هي مندفعها نحنا برمضان أو يوم العيد هذه مع كفارة اليمين مع فدية الصيام اللي ما قادر يصوم عم يدفع فدية كل هيدول والنذر العام ما بياخدن أي إنسان منها إن المنسوب لا تحل له قال عليه الصلاة والسلام عن الزكاة: “لا تحل لآل محمد ولا لمحمد” صلى الله عليه وعلى آله وصحبه وسلم.
يا أحباب نعم ما بياخد النبي الزكاة ولا آل النبي كل جاء من أقرباء النبي اللي هو بيرجع نسبهم من طريق السيدة فاطمة وكمان هاشم وعقيل كل هيدول ما بياخدوا زكاة إنما يعطون من أشياء أخرى إن كانوا فقراء فيك تعطيهم هدية مثلا.
فمن نذر يا أحباب ما بقوم بيعطي أي إنسان ولا هو بياكل من هذا النذر أنا نذرت أن أذبح خروف لله تعالى ووزعه بوزعه على فقراء غير منسوبين، واضح يا أحبابي هيدي كتير مهمة كتير من الناس بقوموا بيدفعوا زكاتهم لمن لا تصح ولا تسقط عنك بيعطوها مثلا لبعض الجمعيات بقوموا بحطوهم بالبنوك ما بيصح أو بيدفعوهن لناس مكتفين أو بيعطوهن لناس منسوبين أو هو بالأصل منو فقير، باسم الفقر أخذها إلى غير ذلك، فتنبهوا بارك الله فيكم حتى تسقط عنك يعني حتى تبرأ ذمتك إنت من هذا الأمر وهنا أمر كمان مهم يا أحباب وهو أن الفديات والكفارات وزكاة الفطرة كمان بدنا نتعلم لمين بدنا ندفعها، أما العقيقة الي بتندبح لإنو إجاني مولود فهذه هي بتتقسم بهالطريقة تلت بياكلوها أهل الولد وتلت للفقراء وتلت للأصدقاء، فهذه كمان فيك توزعها كلها للفقراء هذه غير لما تكون منذورة أو زكاة أو نحو ذلك والنذر لا يكون في معصية، واحد نذر شو يعمل حرام ما بيثبت قلنا وما بنفذه وكذلك إذا حلف قال والله العظيم بدي أعمل كذا وكان هالشي حرام ما بيعمله وبيعمل كفارة يمين، كذلك يا أحباب إذا الإنسان منا نذر أن يفعل شيئا وكان معه هذا المال الذي نذره فورا يوفي ما يأخر أحسن هذا من باب الإنسان منا بعجل في الخيرات، وكذلك أيضا إن تحقق ما كنت علقت النذر عليه يعني إنت قلت إن شفي ولدي بدي أعمل كذا كذا نذرا علي أعمل كذا كذا فورا إن شفي ولدك افعل هذا النذر، وكان بعض الناس نذروا مثلا أنه إن جاءهم مولود أو رأوا النبي عليه الصلاة والسلام يتصدقون بكذا وكذا من المال، فهذا إن حصل لهم فورا أيضا ينفذون هذا النذر، ولا ينذر يا أحباب ليحرم الورثة هيدي مسألة كمان مهمة واحد قال نذرا علي إنو بدي أعطي الجمعية الفلانية كل مالي بعد موتي حتى يحرم مين؟ مثلا إبنه هذا لا يجوز ليش لا يجوز يا أحباب لإنو قلنا ما بكون هيدا النذر في معصية أما أنا وبحياتي فيّ وزع شي من مالي للفقراء والأيتام وجمعيات خيرية أثق بها أو لاولادي حتى؟ فيها تفصيل، إذا أنا بحياتي وزعت أملاكي تصدقت يعني يجوز وأنا بحث كل واحد يا أحباب يعمل شي لنفسو لأنو قد يجي الورثة بعدك يعني سبحان الله كما حصل مع سيدنا علي كان يقول أبيات من الشعر أو حصل معه قصة دخل سيدنا علي على المقابر فقال: “السلام عليكم دار قوم مؤمنين أنتم السابقون ونحن في الأثر”فرد عليه أحد الأموات خرق للعادة كرامة لسيدنا علي رضي الله عنه وأرضاه فقال له أمير المؤمنين أخباركم أم أخبارنا؟ يعني منسمع منك أو بتسمع منا؟ قال بل أخباركم يا أمير المؤمنين، قال: أما أزواجكم فقد تزوجوا من بعدكم يعني من حيث العادة وأولادكم حشروا في زمرة الأيتام وبيوتكم التي بنيتموها سكنها غيركم ومنهم من لا تحبون، وأموالكم التي جمعتموها تقاسمها الورثة ومنهم من أعدائكم”. معاداه بس شو؟ بيورثه، يعني هيدي حال الدينا من حيث الغالب يا أحباب، قاله وأنتم ما أحوال ما عندكم”؟ قال له:”أما نحن فقد تقطعت الأكفان وسالت العيون على الخدود وأكل الجسد الدود وكلنا مُرتهن بعمله إما فائز إلى الجنة وإما معذّب في النار.
فأنا بقول كل واحد من الآن يعمل قد ما يجي حدن بعدك يعملك، الورثة قد ينسوك أنا ما عم إحكي عن الكل، ولكن أنت الآن بعدك عايش ما عم قول الواحد ما يعمل شي لاولادو أو مرتو أو نحو ذلك بالعكس أنا إذا واحد فعل لأولاده اشترى لهذا بيتا مثلا ولهذا بيتا هيدا فيه ثواب إلو ثواب لله تعالى، بس أنا عم قول كمان أن تفعل الخير وما تنطر إنو من بعدك يعملولك، قد ينسوا من هذه الدنيا يا أحباب بتشوف إنت أمور عجيبة فيها، فبعض الناس ما بيتذكروا يستغفروا لأبويهم ولا يتصدقوا عن روحهم.
الحاصل أنا لما بدي إنذر يا أحباب أنذر ما كان فيه قربة طيب إذا كان أنا بدي أعطي ولادي بحياتي فيّ؟ نعم فيّ، فيك لكن قال بعض العلماء: “تسوي بين الأولاد، إذا أعطيت هيدا بيت بتعطي التاني بيت، فيك تعطي واحد أكتر من واحد؟ عند بعض العلماء نعم وعند بعض العلماء لأ، لأنو وارد حديث هني فسروه، إنو أنا بدي ساوي بين أولادي ولو في القبَل حتى إذا بست هيدا من باب الاستحباب بالبوس يعني القبلة بوس التاني، وإذا كان منو موجود أحفظ له، سبحان الله العظيم، فالنذر الو شروط الو ضوابط الواحد منا قبل أن يدخل يتعلم والله تعالى قال: {يُوفُونَ بِالنَّذْرِ} هيدا مدح لمين، للذين يوفون بالنذر إذا نذروا التزموا ما نذروا.
أما السؤال السابع والعشرون قال: ما الدليل على أن صوت المرأة ليس بعورة؟
أول شي يا أحباب صوت المرأة ليس بعورة حتى المعتدة عدة وفاة مات زوجها أو عدة طلاق كتير من الناس بقولوله إنت صوتك عورة، لأ ما صحيح، حرام عليها تحكي بالحرام، أما لو حكيت مع الرجال لو واحد دق عليها وما في خلوة محرمة فقالت من؟ ما فرض عليها تخشن صوتها متل ما كان يعمل بعض الجهال ك يقولولها تحطي ايدك تعملي هيك، لأ هيدا تضييق حتى قالولها حرام عليك تطلعي بالمراية وحرام تتحممي وحرام تغيري تيابك، لا هيدا منو من الإسلام، حرام تلبس زينة ما فيه زينة وطيب فترة العدة لما تكون عم تعمل عدة وفاة لا بتتزين حتى الخاتم وإسوارة وهيك قضايا ولا بتحط شي فيه عطر حتى الصابون المطيب تتجنبه كأنها بالإحرام يعني، سبحان الله فترة هذه العدة هذا لمن كانت عم تعمل يا أحباب عدة وفاة يعني مات زوجها.
طيب هل وجه المرأة عورة؟ كمان لأ لو قدام الرجال؟ نعم لو كان أمام الرجال لو كانت جميلة؟ لو كانت جميلة، بس نحن منقول يسن لها تغطية الوجه هيدا اللي منسميه النقاب، هذا النقاب سُنة، بعض الذين يعني عندهم انحرافات تشددوا في غير محله وزادوا على الدين ما ليس من الدين وقالوا: يجب عليها أن تلبس الجلباب والنقاب، شو هو الجلباب؟ هيدا شي بتغطي المرأة فيه جسدها من رأسها لإجريها منسميه الشادور ببعض البلاد والملاية والشلحة ببعض البلاد بقولولها هذا الجلباب يلبس فوق الثياب، هذا من السُنة للمرأة وليس واجبا، أما تغطية وجهها فهو سنة إلا زوجات النبي الطاهرات البارات رضي الله عنهن أمهات المؤمنين كان الن أحكام خاصة بهن من هالأحكام فرض عليهم أمام الأجانب شو يعملوا؟ يغطوا الوجه أما صوتها فليس بعورة، بدليل الله تعالى قال في القرآن الكريم: {وَقُلْنَ قَوْلًا مَعْرُوفًا} هل يأمر الله بالحرام؟ الله أمرهن أن يقلن قولا حسنا معروف يعني خير، فكانت السيدة عاشة رضبي الله عنها تدرس الرجال والنساء، السيدة أم الدرداء الصحابية الكريمة رضي الله عنها كانت تدرس الرجال والنساء أم سلمة رضي الله عنها زوج رسول الله صلى الله عليه وسلم كانت تُدرس الرجال والنساء، بعدين اسمعوا هالحادثة اللي كلنا منعرفها ومشهورة، عن سيدنا عمر الفاروق رضي الله عنه الي كان ما يسكت عن باطل رآه وقال: “ما ترك الحق صاحبا لعمر” شو يعني؟ يعني أنا صديقي الحق وين ما كان، ففي ناس بتزعل مني لأني مع الحق، هو مع الحق رضي الله عنه وأرضاه كان عم يخطب مرة وحددلهن المهور يعني قالهن ما حدن يزيد بمهر النساء على كذا وكذا وكذا وقالهن الي بزيد بدي آخد هالزيادة وأضعها في بيت مال المسلمين أكيد هيدا حكم كان غلط وتراجع عنه وهيدي ما فيها طعن بسيدنا عمر بل هيدي فيها مدح لإلو لأنو متواضع لأن وقفتلو مين راجعته إمرأة بس كانت فقيهة عندها علم قالت له: يا أمير المؤمنين انظروا الأدب، “كلامك أحق أن يُتبع أم كلام الله” هيدي الكلمة يا أحباب اللي بخاف ربّ العالمين بيوقف عندها وهيك عمل سيدنا عمر قال لها: كلام الله” انو ما فيها شك يعني، وماذا قلت ما عندك شو عملت أنا ليه حتى تقوليلي هيك؟ قالت له: أنت حددت المهور، وشوفوا عم تعطيه دليل هلق، والله قال: {وَآَتَيْتُمْ إِحْدَاهُنَّ قِنْطَارًا فَلا تَأْخُذُوا مِنْهُ شَيْئًا}والقنطار بعضهم قال: “أكتر من ألف وقية من الدهب” وبعضهم قال أكتر شي كتير، قال لاتأخذوا منه شيئا، بقوم سيدنا عمر بيرجع وبقول: “كلٌ أفقه من عمر أخطأ عمر وأصابت امرأة أخطأ عمر وأصابت امرأة أخطأ عمر وأصابت امرأة” شوفوا هالتواضع ورجع بيّن للناس مش طنش، الله يرحمنا بس وين الدليل؟ الموضوع صوت المرأة إنو منو عورة ما قالها كيف بتحكيني أنت؟ أنت امرأة وأنا رجل وأنا أجنبي عنك يعني مني حلالك، كيف أنت بتحكي؟، لأ كان أسكتها لكن ما سكتها وهكذا حصل مع النبي عليه الصلاة والسلام لما صلى صلاة العيد دخل هو وسيدنا بلال الحبشي المؤذن رضي الله عنه وأرضاه إلى مصلى النساء في العيد، كان فيه برات المسجد مكان يجتعوا فيه النساء خصوصا بيناتن في حيض ليسمعوا خطبة النبي ويستفيدوا بالتوجيه فات لعندهن الرسول عليه الصلاة والسلام وحثّهن على الصدقة مين كان معه؟ سيدنا بلال، فقال لهن الرسول صلى الله عليه وسلم:”تصدقن فإني رأيتكن أكثر أهل النار”، قلن يعني حكيوه يعني قدام بلال لمِ يا رسول الله ليه نحن أكتر أهل النار؟ قال: “تكثرن اللعن وتكفرن العشير” يعني إنتوا بتعملوا أنو لما الواحد من الرجال زوجك يعني بيحسن إليكم الزمن إذا قصر معك أو أخطأ مرة بتقوليلو ما شفت منك يوم منيح بتنكري الخير يعني، هلأ في بعض الرجال بيعملوها ولكن هذا كثر في النساء، فإياك هيدي حرام من الكبائر وكذب وكسر قلبه لهالرجال وهيدي كبيرة، والتانية قال: “يكثرن اللعن” يعني بغير حق، بتلعن فلان وبتلعن فلان وبتلعن فلان وهيدي كمان من الكبائر، فلو كان صوتها عورة، شو كان قالهن ما تحكوا قدام بلال.
انتبهنا يا أحباب، وكذلك أيضا وهيدي كمان حادثة منختم فيها وفيها فوائد كبيرة أول شي حتى ما يتشددوا بغير محله حتى ما يحكي الواحد من عندو وهيدا اللي قال أنو أنا سمعت الخطبة والدرس والكلام من سيدنا أبو بكر وسيدنا عمر وسيدنا عثمان وسيدنا علي قال وسمعه من السيدة عائشة قال: “وما سمعت كما سمعت من عائشة” الله أكبر كان عندها أسلوب بالتدريس والكلام مع الناس كان هيدا رجل غريب أجنبي يعني يعتبر منو إبنها ولا هو رحم لإلها،.
فالحاصل في الختام يا أحباب بدي أذكر هناك يا أحباب العلماء ذكروا ذلك يعني في كتبهم وفي رواية الطبراني وعدّوها العلماء في كتبهم متل ابن عابدين في كتاب حاشية رد المحتار على الدر المختار زكريا الأنصاري في روض الطالب إلى غير ذلك، سيدنا ابن عساكر هيدا العالم كان عندو ألف شيخ و300 شيخة إلى غيرها، كان في واحدة يقال لها المرأة الخثعمية من بني خثعم إجت صبيحة العيد إلى مِنى وكان الرسول عليه الصلاة والسلام مركّب على الدابة وراه الفضل بن عباس ابن عمه عم تسأله “إن أبي أدركته فريضة الحج وهو كبير في السن لا يثبت على الراحلة يعني من كبر سنه ما قادر نحطه حتى على الدابة نحمله أأحجّ عنه؟ قال: حجي عنه، مين صار يطلع عليها عجبتو؟ الفضل، شو صارت تعمل هي؟ صارت تطلع عليه أعجبها حسنه، فشو عمل سيد العالمين ما قالها غطي وجهك حرام عليك ما قالها اسكتي صوتك عورة! إنما شو عمل؟ أدار عنق ابن عمه، قامت هي صارت تطلع للميلة التانية رجع شو عمل؟ أدار عنق ابن عمه مين شاف؟ العباس أبوه للفضل عمو للرسول كان بالمجلس، صلى الله على رسول الله، قال له: لِم أدرت عنق ابن عمك يا رسول الله؟ فقال عليه الصلاة والسلام: رأيت شابا وشابة فخشيت عليهما الشيطان” شو أخدوا العلماء من هذا الحديث اللي رواه كتار من العلماء والحفاظ؟ قالوا أول شي بجوز الواحد يحج عن غيره، لو بعدو عايش وفيها المرأة تحج عن رجل وشو كمان، إنو صوت المرأة منو عورة وإلا قال لها اسكتي أو لا تتكلمي أمام الرجال، خمسة وجهها منو عورة وإلا كان قال لها غطي وجهك ولو محرمة كانت بتبيعد بتعمل هيك ساتر وبتنزل الستارة متل ما كانوا يعملوا زوجات النبي، والاختلاط اللي هو ضمن الحشمة والأدب منو حرام، وأحكام كتيرة منها إنو النبي بإيدو عليه الصلاة والسلام أنكر المنكر.
فيا أحباب لا تتسرع في قول حلال وفي قول حرام، قال أحد التابعين: “إذا سُئلت مسألة عرضت نفسي على الجنة وعلى النار، في أيها أكون إن تكلمتُ”.
الله تعالى يختم لنا بالحسنى ويزيدني أنا وإياكم علما وفهما آمين والسلام عليكم ورحمة الله وبركاته.
